令你一生受用的話

今天回校上課,大家同學都分享自己出實習所遇見的事.包括開心的,也有被人罵的

有一個同學分享自己被老師罵到七彩,只要呆在那兒一秒便會罵,他很不開心,也在猶豫是否應堅持。說著的時候，他也哭了。

我們坐在他旁，老師一邊開解他，老師說的東西太一生受用了，因此不得不在此記下

我只是很零碎的記得重點的說話




「你的老師其實很用心良苦，你估佢鬧人佢好開心咩？佢都好激氣嫁，佢都死好多細胞嫁！但點解佢要話你？就係唔想見住你跌落坑都唔出聲。日後你出來做野，你會見到更加多人，唔話你由得你唔代表好嫁，Ｄ人分分鐘睇住你跌落坑然後係背後笑你添呀！」

「老師唔一定比你叻，只不過比你有更多既經驗，見得更加多。」

「離開，放棄，係一件好易既事；堅持，不放棄，先至係真正難做到既事！」

「Problem is not a problem, how to solve the problem is a problem!要學識去解決問題!」

「我地對住既唔係死物，而係人命，lives！所以有一秒猶豫都好大件事！例如同個Patient沖涼，你呆左幾秒係度，佢咪冷親囉！」

「記唔記得大長今句口頭禪呀？『冇人可以教我放棄，我唔會放棄！』真正放棄自己既只有自己，可能你比人行既路係長左先到目的地，但係你見識既野又會多左，唔會係冇用嫁！呢Ｄ會成為你既經驗！」

「我寧願而家話你，教好你，都唔想第日你出到來做錯野，係人命！到時你面對既唔係老師，而係警察同法官。」

「我唔想第日係報紙見到你地個名，我會好傷心。」

「做護士係會面對好多壓力，如果唔識化解，好易會有Depression!」

「要訓練自己既EQ，比人話完之後，要復原，唔好把負面情緒放係心入面。」

「做人要識過濾。有時可能人地會罵錯你嫁！人地唔知嘛！但係過後唔好留負面情緒係個心度，只要你知唔係你做錯就得喇！做人要識過濾資訊呀！」

「上 帝比左樣好好既野我地，就係Tears。喊出來係好嫁！幫你抒發左情緒。有時你會覺得喊左會舒服Ｄ，因為你將唔開心既野釋放左。另外一樣係Time。時間 係好好既藥，我地一時間可能會好唔開心，每個人都需要時間去接受，去淡化。第三，Talk。有時講左出來，你會覺得比屈住舒服，你肯講你心入面既感受比人 聽係好嫁，係幫緊你自己。」

「做護士，要係感性同理性取得平衡。有時太過理性，會變左唔理病人既感受。病人係有生命，會覺得痛，會唔開 心，如果你唔理，咁同治療一個機械人冇分別。但係有時太過感性又唔好，唔通你見到Patient死，你好傷心，次次都喊，如果你一日見好多個咪會承受唔 到？唔係叫你冷血，我地都要尊重Patient，會覺得傷心，但係適當既時候要把情緒抽離。」
最後,同學的心情也平伏下來,決定再堅持一下。

我自己也是很眼淺的人，被人話一話就會哭，今次比較感恩，遇上有耐性的老師，暫時實習也沒有罵我們。今天聽到的真的對我自己也一生受用！

也許我想說一句，每個人的性格不同，有的人受軟不受硬，有的人一定要人罵才會改過，有時，可能平心靜氣說話比罵人來得更大效果。

嗯，我會成長的。

老師，我會把你的話記在心上。

 小小姑娘仔成長日記Facebook︰
https://www.facebook.com/happylittlenurse